يوم 27 أنا نازل ع التحرير
مش ناوي أعادي الجيش ولا اشتم المشير
أنا نازل أحيي الثورة وأحقق التغيير
أنا نازل عشان اطالب بمحاكمة الخنازير
أنا يوم ما عملت الثورة كان هدفي فيها واضح
اشوف بلدي الجميله صاحبة أجمل ملامح
أشوف الأرض خضرا والزرع فيها صابح
ومفيش في الحق رجعة ولا فيه أبدا تصالح
أنا يوم ما عملت الثورة بقيت كنّاس شوارع
مسحت ترابك يا بلدي بعرقي وبالمواجع
ويوم ما قالولي ارجع ف ثواني كنت راجع
سمعت كلامك يا جيشنا وعايزك تبقالي سامع
أنا نازل يا جيشنا تاني ومستحيل أعاديك
لكن أعدائي هما دلوقتي بقوا أعاديك
عدّيني م الضلمه ديه صدقني راح أعديك
مالكش يا جيشنا بعدي ولا لي انا بعديك
يوم 27 أنا نازل ع التحرير
عشان الثورة فكرة محتاجة للتذكير
عشان الثورة دعوة محتاجة للتبشير
عشان الثورة نقلة م الضلمة للتنوير
الثورة ماهيش كلام ولا خطبة علي المنصة
دي حكاية شعب عايز يبقاله تاريخ وقصة
شعب اللي قتله نايم ف فراش مريح وثير
بيفطر الكافيار وبيجامته من الحرير
مستشفي خمس نجوم بتطُّل علي الخليج
والأمن تمّلي واقف علي باب سيدنا الأمير
الثورة ماهيش أغاني مفعولها كالتخدير
ولا مُزّه من اللي هما غاويين قوي التصوير
واقفة قصاد دبابه واقفة جنب السرير
وكل شعار نقوله مخلوط ب100 تبرير
الثورة يا بلدي طاقه بتفجر الأسارير
الثورة نضال طويل تقرير حق المصير
مصباح بيضئ طريق الشغل والتطوير
عدالة لكل أهلي ولا وصلة ولا تشفير..!!
يوم 27 أنا نازل ع الميدان
ورسالتي واضحة جدا الحق والتبيان
حاكموا اللي قتلوا أخويا حاكموا تاني الجبان
عايز كرامتي ترجع عايز أحيا ف أمان
حاسبوا ع الدم طبعا قبل حساب البنوك
تضخم ثروة إيه وتوهان بين الصكوك؟؟
ده طريق مزروع بورد لكن مفروش بشوك
بلاش شغل السياسة وبلاش نبني الشكوك
يا مجلس القياده يا مجلس الظباط
الثورة كانت نتيجة للظلم والإحباط
عايزين حقوقنا ترجع عايزين الانضباط
بلاش حد يسحب من تحتيكوا البساط
أنا هنزل التحرير علشان شايل أمانة
معايا رساله ليكوا وانتم ليكم مكانه
اوعوا تبيعم حقوقنا للي هدر دمانا
حاكموا اللي قتلنا فورا بتهمة الخيانة..!!
ليست هناك تعليقات:
إرسال تعليق